Աֆղանստանը բնական աղետի գոտում. 61 զոհ, ճանապարհները փակ են, տները՝ փլված

Աֆղանստանում տեղի ունեցած ուժեղ ձնաբքերի և սառցե անձրևների հետևանքով առնվազն 61 մարդ է զոհվել։ Այս մասին տեղեկացրել է տարերային աղետների հետևանքների վերացման ազգային վարչությունը (ANDMA):

«Վերջին երեք օրերին ուժեղ անձրևների և ձյան տեղումների հետևանքով երկրի տարբեր նահանգներում զոհվել է 61, տուժել՝ 110 մարդ»,- նշված է կառույցի տարածած հաղորդագրությունում։

Բնական աղետի հետևանքով ամբողջությամբ կամ մասնակի փլուզվել է 458 տուն, ինչից տուժել է 360 ընտանիք, ինչպես նաև ոչնչացել է 620 գլուխ անասուն։ Առավել շատ տուժել են թույլ զարգացած ենթակառուցվածքներ ունեցող լեռնային և գյուղական բնակավայրերը։ Երկրի գրեթե բոլոր գլխավոր և երկրորդական ճանապարհները փակ են, իսկ ենթակառուցվածքների վնասման պատճառով ընդհատվել է արտասահմանից էլեկտրաէներգիայի մատակարարումը։

Աֆղանստանի օդերևութաբանների կանխատեսմամբ՝ երկրի մի շարք շրջաններում առատ ձյան տեղումները կարող են շարունակվել նաև այս շաբաթ։