Պաշտպանը պահանջել է առերես հարցաքննություն Վալոդյա Գրիգորյանի սպանության գործով

Այսօր՝ հունվարի 23-ին, Փարաքարի համայնքապետ Վալոդյա Գրիգորյանի սպանության գործի քննության ընթացքում մեղադրյալ Նարեկ Օհանյանի պաշտպան Վահան Հովհաննիսյանը հայտարարել է, որ քրեական վարույթով հանրային մեղադրող և նախաքննության ընթացքում որպես հսկող դատախազ հանդես եկող Շահբազյանը անաչառ չի եղել գործով ճշմարտությունը բացահայտելու հարցում։

Պաշտպանի խոսքով՝ վարույթն իրականացնող մարմինը չի ապահովել համակողմանի, լրիվ և օբյեկտիվ քննություն, քննությունը իրականացվել է անհասկանալիորեն շտապ և հապճեպ, իսկ մեղադրական եզրակացությունը կազմվել և հաստատվել է առանց անհրաժեշտ քննության։

Նա նշել է, որ գործը մեծ հասարակական հնչեղություն ունի, և հանրային ու քաղաքական տարբեր շրջանակներում քննարկվել են սպանության հնարավոր տարբեր վարկածներ, այդ թվում՝ պատվիրված լինելու, պատվիրատուների չհայտնաբերման և սպանության՝ Վոլոդյա Գրիգորյանի պաշտոնական դիրքի կամ քաղաքական գործունեության հետ կապ ունենալու վերաբերյալ։

Վահան Հովհաննիսյանի խոսքով՝ այդ վարկածների առկայությունը կամ բացակայությունը պարզելու համար պետք է իրականացվեր բազմակողմանի քննություն, սակայն վարույթի շրջանակում որևէ այլ վարկած առաջ չի քաշվել, չեն իրականացվել համապատասխան քննչական կամ ապացուցողական գործողություններ և չեն կայացվել դատավարական որոշումներ։

Պաշտպանը ընդգծել է, որ վարույթն իրականացնող մարմինը սկզբից ևեթ առաջ է քաշել միայն մեկ վարկած՝ վրեժի շարժառիթով սպանությունը, նշանակել է երկու մեղավոր և ողջ քննությունն իրականացրել է բացառապես այդ վարկածի շրջանակում։ Նրա խոսքով՝ հսկող դատախազի կողմից նույնպես չեն տրվել հանձնարարություններ՝ քննության համակողմանիությունն ապահովելու նպատակով։

Վահան Հովհաննիսյանը նշել է, որ դեռևս այն փուլում, երբ սպանության շարժառիթը և կատարողը պարզված չեն եղել, գործով առաջ է քաշվել վենդետայի վարկածը՝ առանց փաստական հիմքերի ստուգման։

Պաշտպանը նաև միջնորդել է Նարեկ Օհանյանի և մյուս մեղադրյալ Գևորգ Հարությունյանի միջև առերես հարցաքննություն անցկացնելու համար՝ նշելով, որ նրանց ցուցմունքներում առկա են լուրջ հակասություններ, մասնավորապես բենզինի շշի ձեռքբերման և կիսակառույց տան բակում գտնվելու վերաբերյալ։

Նրա խոսքով՝ առերեսման միջնորդությունը մերժվել է, քանի որ առերեսման ընթացքում կարող էին ի հայտ գալ փաստական տվյալներ, որոնք կարող էին հերքել Նարեկ Օհանյանի մեղավորությունը և հանգեցնել քրեական հետապնդման դադարեցման։