Ֆրանսիան չի միանում Խաղաղության խորհրդին․ Թրամփը մաքսատուրքեր կսահմանի

ԱՄՆ նախագահ Դոնալդ Թրամփը հայտարարել է, որ կարող է մինչև 20% տոկոս մաքսատուրք սահմանել ֆրանսիական գինիների և շամպայնի վրա՝ նպատակ ունենալով ճնշում գործադրել Ֆրանսիայի նախագահ Էմանուել Մակրոնի վրա՝ նրան ներգրավելու իր նախաձեռնած «Խաղաղության խորհրդում»։ Խորհուրդը, ըստ Թրամփի, պետք է զբաղվի Գազայի հատվածում խաղաղության վերահսկմամբ։

Bloomberg-ի աղբյուրների փոխանցմամբ՝ Մակրոնը չի պատրաստվում միանալ նախաձեռնությանը՝ համարելով, որ դրա նպատակները սահմանափակված չեն միայն Գազայով և կարող են հակասել ՄԱԿ-ի սկզբունքներին ու ինստիտուցիոնալ մեխանիզմներին։ Այդ մտահոգությունների պատճառով Ֆրանսիան հրաժարվում է մասնակցությունից։

Reuters-ի փոխանցմամբ՝ Թրամփը լրագրողների հարցին ի պատասխան նշել է, որ Մակրոնի հրաժարումը իր համար որոշիչ չէ՝ ընդգծելով, որ Ֆրանսիայի նախագահական ժամկետն ավարտվում է 2027 թվականին։ Նա կրկնել է մաքսատուրքերի կիրառման սպառնալիքը՝ որպես քաղաքական լծակ։

«Խաղաղության խորհրդի» ձևավորման մասին Թրամփը հայտարարել է հունվարի 16-ին։ Սկզբնական գաղափարով այն պետք է գործեր որպես Գազայի վերականգնմանն ուղղված անցումային կառույց։ Սակայն, ըստ Bloomberg-ի, խորհրդի կանոնադրությունը նախատեսում է ավելի լայն առաքելություն՝ կայունության խթանում և հակամարտություններից տուժած տարածքներում կառավարելիության ապահովում։ Financial Times-ը նշում է, որ կառույցը կարող է մրցակցել ՄԱԿ-ի մանդատի հետ։