Ռուսաստանը վճռականորեն աջակցում է Իրանին և մերժում՝ նոր ռազմական հարվածներ հասցնելու սպառնալիքները․ Զախարովա
Ռուսաստանը հայտարարում է, որ վճռականորեն աջակցում է Իրանի Իսլամական Հանրապետությանը և անընդունելի է համարում ցանկացած արտաքին միջամտություն երկրի ներքին գործերին։ Այս մասին հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան, գրում է «ՏԱՍՍ»-ը։
«Արևմուտքի անօրինական պատժամիջոցային ճնշումներն օգտագործվում են Իրանում սոցիալական դժգոհությունը բռնի անկարգությունների վերածելու համար, որոնք ուղեկցվում են իրավապահ մարմինների, աշխատակիցների և խաղաղ քաղաքացիների, այդ թվում ՝ երեխաների սպանություններով»,- ասել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան:
Նրա խոսքով՝ Մոսկվան կտրականապես մերժում է Իրանին նոր ռազմական հարվածներ հասցնելու սպառնալիքները, դրսից ներշնչված անկարգությունները որպես ագրեսիայի պատրվակ օգտագործելու փորձերը, ինչպես նաև առևտրային սակագների միջոցով Իրանի գործընկերների տնտեսական շանտաժը:
