Մեծ Բրիտանիան կարտադրի նոր բալիստիկ հրթիռներ՝ Ուկրաինայի համար. այն կհասնի մինչև Մոսկվա. Daily Mail

Մեծ Բրիտանիան նախատեսում է Ուկրաինայի համար արտադրել նոր բալիստիկ հրթիռներ՝ Nightfall անվանումով նախագծի շրջանակում։ Այդ մասին հայտնում է Daily Mail պարբերականը:

Ըստ հրապարակման՝  նշված հրթիռները կարող են թիրախներ խոցել ավելի քան 480 կմ հեռավորության վրա: Պարբերականի փոխանցմամբ՝ տեսականորեն նման հրթիռները կարող են հասնել մինչև Ռուսաստանի մայրաքաղաք՝ Մոսկվա, հաշվի առնելով, որ այն գտնվում է Ուկրաինայի Սումիի մարզի սահմաններից մոտ 425 կիլոմետր հեռավորության վրա։

Պարբերականի տվյալներով՝ Մեծ Բրիտանիայի պաշտպանության նախարարությունը ներկայումս որոնում է ընկերություններ, որոնք կզբաղվեն նախագծման և առաջին երեք փորձնական հրթիռների ստեղծման աշխատանքներով։ Նախնական պայմանագրի արժեքը գնահատվում է շուրջ 9 միլիոն ֆունտ ստերլինգ։

Նյութում առաջին փորձնական հրթիռների արտադրության ժամկետները նշված չեն։