Իրանի կառավարության տապալումը կլինի՝ Համասի, Հեզբոլլահի և հուսիթների վերջը. Իսրայելում ԱՄՆ դեսպան
Իսրայելում ԱՄՆ դեսպան Մայք Հաքաբին հայտարարել է, որ Իրանում ներկայիս իշխանությունների հեռացումը կնշանակի Թեհրանի կողմից աջակցվող զինված խմբավորումների վերջը, ինչպիսիք են ՀԱՄԱՍ-ը, «Հեզբոլլահը» և հուսիթները: Դիվանագետը այս մասին գրել է X սոցիալական ցանցում։
Հաքաբին նշել է, որ իրանցի ժողովրդի հնարավոր որոշումը՝ ավարտելու ավելի քան 46 տարի տևած կառավարման շրջանը, կարող է արմատական փոփոխություններ բերել տարածաշրջանում։
Դեսպանի գնահատմամբ՝ նման զարգացումը կարող է նպաստել պարսկական մշակույթի վերածննդին՝ հիմնված կրթության, արվեստի, երաժշտության և ազգային ներուժի վրա։ Նրա համոզմամբ՝ դա միաժամանակ կնշանակի նաև Իրանի աջակցությամբ գործող զինված կառույցների գոյության ավարտը։
Հաքաբին իր հայտարարության մեջ շեշտել է, որ փոփոխությունները կախված են հենց իրանցի ժողովրդի ընտրությունից և ներքին քաղաքական գործընթացներից։
