Մակրոնը, Սթարմերը և Զելենսկին ստորագրել են Ուկրաինայում զորքերի տեղակայման վերաբերյալ հռչակագիր
Ֆրանսիայի, Մեծ Բրիտանիայի և Ուկրաինայի առաջնորդները Փարիզում ստորագրել են հրադադարից հետո Ուկրաինայի տարածքում բազմազգ ուժերի տեղակայման վերաբերյալ հռչակագիր։
«Այսօր մենք զգալի առաջընթաց ենք գրանցել՝ տրամադրելով հուսալի երաշխիքներ երկարատև խաղաղության համար»,- ասել է Ֆրանսիայի նախագահ Էմանուել Մակրոնը հանդիպումից հետո տեղի ունեցած մամուլի ասուլիսում:
Նա նշել է, որ այդ երաշխիքները ենթադրում են, որ Ռուսաստանի և Ուկրաինայի միջև ցանկացած խաղաղության համաձայնագիր ապագայում չի խախտվի։
«Հավաստի անվտանգության երաշխիքները և բարգավաճման ապահովման պարտավորությունները կարևոր են Ուկրաինայում երկարատև խաղաղություն հաստատելու համար, և մենք կշարունակենք համատեղ աշխատել դրան հասնելու համար»,- սոցիալական ցանցերում գրել է ԱՄՆ նախագահի հատուկ ներկայացուցիչ Սթիվ Ուիտքոֆը։
Նա հայտարարել է, որ ամերիկյան և եվրոպական կողմերը կշարունակեն քննարկումներն ուկրաինական պատվիրակության հետ:
«Մենք հույս ունենք մոտ ապագայում հասնել ավելի մեծ դրական ազդակի»,- եզրափակել է նա։
Ամերիկյան կողմից, Ուիտքոֆից բացի, Փարիզում կայացած հանդիպմանը մասնակցել է ԱՄՆ նախագահի փեսան՝ Ջարեդ Քուշները: Եվրոպական երկրներից ներկա էին Մակրոնը, Ուկրաինայի նախագահ Վլադիմիր Զելենսկին, Մեծ Բրիտանիայի վարչապետ Քիր Սթարմերը, Գերմանիայի կանցլեր Ֆրիդրիխ Մերցը և եվրոպական երկրների այլ առաջնորդներ:
