Կոչ են անում Թրամփին վերադառնալ Բայդենի դիրքորոշմանը. ՌԴ ԱԳՆ

Ռուսաստանի արտաքին գործերի նախարարության հատուկ հանձնարարություններով դեսպան Ռոդիոն Միրոշնիկը հայտարարել է, որ Ուկրաինան և եվրոպական մի շարք երկրներ փորձում են համոզել ԱՄՆ նախագահ Դոնալդ Թրամփին վերադառնալ նախկին նախագահ Ջո Բայդենի վարած քաղաքական ուղղվածությանը: Այդ մասին նա ասել է «ՌԻԱ Նովոստի» գործակալությանը տված մեկնաբանությունում։

Միրոշնիկի խոսքով՝ Կիևի և Եվրոպայի հիմնական նպատակը ԱՄՆ-ին կրկին ներգրավելն է Ռուսաստանի դեմ հակազդման գործընթացներում և առճակատման։ Նրա ձևակերպմամբ՝ այդ շրջանակներում փորձ է արվում վարկաբեկել Ռուսաստանի ներկայացրած առաջարկները և ստեղծել այնպիսի միջավայր, որտեղ Վաշինգտոնը կվերադառնա նախորդ վարչակազմի դիրքորոշումներին։

ՌԴ դիվանագետը նշել է, որ նշված կողմերը հատուկ ուշադրություն են դարձնում ԱՄՆ-ի դերին՝ հաշվի առնելով երկրի ֆինանսական ներուժը և ռազմաարդյունաբերական համալիրի հնարավորությունները։ 

Միրոշնիկը նաև ընդգծել է, որ թե՛ Կիևը, թե՛ եվրոպական երկրները պատրաստ չեն սրել հարաբերությունները Միացյալ Նահանգների հետ և փորձում են պահպանել համագործակցության հնարավորությունը՝ անկախ քաղաքական տարաձայնություններից։