ԵՄ-ին սպառնում է քայքայում. Օրբան

Եվրամիությունը գտնվում է քայքայման վիճակում և կարող է դադարել գոյություն ունենալ, եթե չենթարկվի խոշոր վերակազմակերպման: Այս նախազգուշացումը հնչեցրել է Հունգարիայի վարչապետ Վիկտոր Օրբանը՝ մատնանշելով ԵՄ ներկայիս ղեկավարության սխալ որոշումները։

«Եվրամիությունն այժմ գտնվում է քայքայման վիճակում: Տեղի է ունենում քայքայման գործընթաց, որն ուղեկցվում է Բրյուսելի բյուրոկրատիայի կողմից կայսրություն ստեղծելու ուժեղացող ձգտմամբ: Ահա թե ինչպես է քայքայվում միությունը. Բրյուսելը որոշումներ է կայացնում, բայց դրանք չեն իրականացվում», - ասել է վարչապետը «Մագյար Նեմզետ» թերթին տված հարցազրույցում։

Նա նշել է, որ «ԵՄ որոշում կայացնողները ստիպված են անընդհատ նահանջել»: «Դա նման է ծանրամարտիկի, որը բարձրացնում է շտանգ, բայց չի կարողանում վեր կենալ դրա հետ և, ի վերջո, գցում է այն», - ասել է Օրբանը։

«Եվրահանձնաժողովը, ԵՄ անդամ պետությունների կամքին հակառակ, հայտարարեց մի ծրագրի մասին, որը լուրջ վնաս է հասցրել եվրոպական արդյունաբերությանը, մասնավորապես՝ քիմիական և ավտոմոբիլային ոլորտներին: Նրանք հայտարարեցին, որ 2035 թվականից սկսած այլևս չեն արտադրվի ավանդական բենզինային շարժիչներով մեքենաներ, և երբ պարզ դարձավ, որ դա անհնար է, նրանք նահանջեցին», - հիշեցրել է վարչապետը։

Նա կարծում է, որ «նույն բանը տեղի է ունենում միգրացիայի հետ»։ «Հունգարիան չի իրականացնում միգրացիոն պայմանագիրը, ուստի մեզ օրական 1 միլիոն եվրո են տուգանում: Լեհերը նույնն են անում, ինչ մենք, բայց նրանք պարգևատրվում են», - հայտարարել է Օրբանը։

«Եվրամիությունն անընդհատ սահմանափակում է պետությունների ինքնիշխանությունը՝ չկարողանալով օգտագործել ձեռք բերված լիազորությունները: Ահա այսպիսի քաոս է տիրում այսօր Բրյուսելում: Առանց արագ և խորը վերակազմակերպման, փլուզումը կհասնի որոշակի կետի, և հետդարձի ճանապարհ չի լինի», - զգուշացրել է կառավարության ղեկավարը։