Հակոբ Արշակյանը՝ 2026 թվականի խորհրդարանական ընտրություններում չառաջադրվելու մասին
ԱԺ փոխնախագահ Հակոբ Արշակյանը չի առաջադրվի 2026 թվականի խորհրդարանական ընտրություններում ՔՊ համամասնական ցուցակում ընդգրկվելու համար: Այս մաիսն լրագրողների հետ զրույցում հայտնել է Արշակյանը:
«2021 թվականին ՔՊ ցուցակով ընտրվել եմ ԱԺ պատգամավոր, այնուհետև՝ ԱԺ փոխխոսնակ: Ես տեսել եմ, որ Հայաստանում ժողովրդավարությանը վտանգ է սպառնում, և ներգրավվել եմ քաղաքական պրոցեսների մեջ»,- պարզաբանել է Արշակյանը:
Ապա շարունակելով ասել է. «Այժմ ես տեսնում եմ, որ մենք անդառնալի կետում ենք գտնվում այն առումով, որ ժողովրդավարությունը Հայաստանում հաստատված է, և մեր ժողովուրդը իր որոշումներով և քվեարկություններով տեր է կանգնում դրան, և տեսնում եմ, որ մեր քաղաքական թիմը ամբողջական և լուրջ կազմով ներկայացված է ցուցակով: Ես տեսնում եմ, որ առավելագույնս արդյունավետ եմ Հայաստանում տեխնոլոգական ոլորտի կայացման, ռազմարդյունաբերական ոլորտի կայացման և զարգացման տեսանկյունից: Տեսնում եմ, որ Հայաստանում արժեք ստեղծող հատվածում շատ ավելի մեծ անելիքներ ունեմ իմ կուտակած փորձով, գիտելիքներով, և ես չեմ ցանկանում ավելորդ համեստություն անել և չասել, որ իսկապես տեսնում եմ, որ կարող եմ այդտեղ իմ պետությանը և ժողովրդին ավելի մեծ ծառայություն մատուցել»:
Նա տեղեկացրել է, որ կուսակցությունից դուրս գալու դիմում չի գրել: «Եթե իմ գործունեությանը կուսակցական գործունեությունը չի խանգարում, իսկ այն չի խանգարում, ապա ես նպատակ չունեմ կուսակցությունից դուրս գալու: Քանի որ ԱԺ-ի նախընտրական ցուցակում ընդգրկվելը և ԱԺ պատգաավոր դառնալը կոնֆլիկտի մեջ է մտնում գործարարություն անելու հետ, և մեր Սահմանադրությամբ դա արգելված է, ես ընտրում եմ մյուս ճանապարհը»,- ասել է Հակոբ Արշակյանը:
