Պատերազմում խնդիր էր պահեստազորի ոչ մարտունակությունը. Սուրեն Պապիկյան

Ազգային ժողովում ելույթի ընթացքում Պաշտպանության նախարար Սուրեն Պապիկյանը հայտարարեց, որ Զինված ուժերի հիմնական առաքելությունը նրա պաշտպանունակությունն ապահովելն է, այլ ոչ միայն մարտական հերթապահությունը։ Նրա խոսքով՝ տարիներ շարունակ մեծ ուշադրություն է դարձվել հերթապահությանը, ինչը կարևոր է, սակայն դրա հետ մեկտեղ անհրաժեշտ է, որ բանակի հիմնական մասը զբաղվի մարտական պատրաստությամբ և կարողությունների բարձրացմամբ։

Պապիկյանը նշեց, որ վարժական հավաքների նպատակը մարզված պահեստազորի ձևավորումն է, որը անհրաժեշտության դեպքում կարող է համալրել բանակը և դառնալ նրա կարևոր մաս։ Նա հիշեցրեց, որ 44-օրյա պատերազմի ժամանակ բանակի հիմնական խնդիրներից մեկը պահեստազորի ոչ մարտունակ վիճակն էր, և այս հարցում պատասխանատվությունը ընդհանուր է, քանի որ տարիներ շարունակ բավարար ուշադրություն չի դարձվել պահեստազորին։

Նախարարը նկատեց, որ հանդիպում են դեպքեր, երբ 45 տարեկան անձը որևէ անգամ չի մասնակցել վարժական հավաքների, ինչը նա աննորմալ իրավիճակ որակեց։ Պլանավորվում է, որ 2026 թվականին վարժական հավաքներին ներգրավվի 20 հազար պահեստազորային, մինչդեռ 2025 թվականին այդ թիվը եղել է 16 հազար։