Օբաման կրկին քննադատել է Թրամփի վարչակազմը
ԱՄՆ նախկին նախագահ Բարաք Օբաման շաբաթ օրը նախընտրական հանրահավաքների ընթացքում հանդես է եկել Վիրջինիայի և Նյու Ջերսիի նահանգներում՝ պաշտպանելով դեմոկրատական կուսակցության նահանգապետի թեկնածուներին։ Նա կոչ է արել ընտրողներին մերժել այն, ինչ անվանել է Դոնալդ Թրամփի վարչակազմի «անօրինականությունն ու անխոհեմությունը», հաղորդում է Reuters-ը։
Վիրջինիայի Նորֆոլք քաղաքում կայացած հանրահավաքում Օբաման աջակցել է նահանգապետի թեկնածու Էբիգեյլ Սփանբերգերին, իսկ Նյու Ջերսիի Նյուարկում՝ Միկի Շերիլին։ Իր ելույթներում Օբաման խիստ քննադատել է Թրամփի «քաոսային» մաքսային քաղաքականությունը, Ազգային գվարդիայի զորքերի տեղակայումը ԱՄՆ քաղաքներում, ինչպես նաև Կոնգրեսի հանրապետականներին՝ Թրամփին զսպելու անկարողության համար։
«Մեր երկիրն այժմ բարդ վիճակում է։ Ամեն օր Սպիտակ տունը մատուցում է անօրինականության, անխոհեմության և խելահեղության նոր չափաբաժին»,- հայտարարել է Օբաման։
Նա նաև նշել է, որ զարմացած է, թե որքան արագ բիզնեսի և ակադեմիական շրջանակները «ծնկի եկան»՝ փորձելով չվիրավորել Թրամփին։ Նյու Ջերսիի հանրահավաքում նախկին նախագահը հավելել է. «Ամեն օրը նման է Հելոուինի, միայն թե այստեղ միայն հնարքներ են, առանց հյուրասիրության»։
Վերջին հարցումների համաձայն՝ Սփանբերգերը և Շերիլը երկուսն էլ զգալի առավելություն ունեն իրենց հանրապետական մրցակիցների նկատմամբ։
