Թիմակիցներիս չեմ uպառնացել․ Բաթոյանը՝ իր առողջապահության հանձնաժողովի նախագահ ընտրվելու մասին

ԱԺ «Քաղաքացիական պայմանագիր» խմբակցության պատգամավոր Զարուհի Բաթոյանը Աժ-ում լրագրողների հետ զրույցում հերքել է մամուլում շրջանառվող տեղեկությունները, թե առողջապահության հանձնաժողովի նախագահի պաշտոնում իրեն չընտրելու համար թիմակիցներին սպառնացել է։

«Իմ թեկնածությունը առաջարկել էր Հասմիկ Հակոբյանը, և ես համաձայնել էի, որովհետև կարծում էի՝ լավ թեկնածու եմ։ Բայց ՔՊ-ն այլ որոշում է ընդունել։ Կային երկու թեկնածու, բնականաբար մեկը պետք է ընտրվի, մյուսը՝ ոչ։ Որևէ խմորում չի եղել, որևէ սպառնալիք չեմ հնչեցրել, չէի էլ կարող հնչեցնել»,-ասել էԲաթոյանը:

Նա ընդգծել է, որ վիրավորված չէ թիմից: 

Հարցին՝ Հռիփսիմե Հունանյանը բարձրագույն կրթություն չունի, միայն բուժքույր է եղել, ճի՞շտ է նման պաշտոնի ընտրել նրան, Բաթոյանն ասել է, որ ցանկացած պատգամավոր կարող է ընտրվել հանձնաժողովի անդամ, փոխնախագահ և նախագահ:

Ճշտող հարցին՝ ո՞վ էր ավելի արժանի, Բաթոյանն ասաց, որ ինքն իրեն է ընտրել: Նա հավելեց, որ համաձայնել էր առաջադրվել, քանի որ համոզված էր՝ ունի համապատասխան փորձ և կարող է արդյունավետ աշխատել: