Հայաբնակ Քեսաբն ամբողջությամբ ծխի մեջ է․ մարդկանց տարհանել են

Սիրիայի Քեսաբ հայաբնակ շրջանի 12 գյուղերից 5-ը մեծ վնասներ են կրել անտառային հրդեհներից, տարհանվել է մոտ 3 տասնյակ մարդ։ Այս մասին NEWS.am-ի հետ զրույցում՝ ասել է Քեսաբի հոգևոր տեսուչ Տեր Եսայի Վարդապետ Էօրտէքեանը։

«Տների շրջակայքում գտնվող այգիներն ու պարտեզներն ամբողջությամբ այրվել են, տների պատերը սևացել են ծխից։ Մարդկանց հիմնականում տարհանել ենք նրանց հարազատների և բարեկամների տներ, շատերը, որոնք երկրորդ տուն ունեն, տեղափոխվել են այնտեղ։ Ծխից չեն կարողանում շնչել»,- նշել է Տեր Եսային։

Նրա խոսքով՝ հրդեհը բռնկվել է նախօրեին կեսօրին, բայց հրշեջները ժամանել են երեկոյան։ 50 մարտական հաշվարկ է աշխատում հրդեհը հանգցնելու ուղղությամբ, սակայն, աշխատանքներին ներգրավված են նաև տեղի հայերը։

«Այս պահին Քեսաբն ամբողջությամբ ծխի մեջ է, ծուխ ենք շնչում, վառված փայտի մոխրի մանր հատիկները տարածվել են օդում, ձյան պես թափվում են։ Հրշեջները տարածքին ծանոթ չեն, և տեղի հայությունը օգնում է նրանց կրակը հանգցնելու գործում։ Գյուղերը գտնվում են լեռնային հատվածում, խիտ անտառներով, ինչը դժվարացնում է աշխատանքներ կատարելը, քանի որ ճանապարհներ չկան»,- հավելել է Տեր Եսային։

Հավելենք՝ Քեսաբի հայ համայնքի շրջնում հրդեհների հետևանքով տուժած մարդիկ չկան։