Ահաբեկիչները չեն խնայվի․ Հնդկաստանն այլևս չի տրվի միջուկային շանտաժին․ Նարենդրա Մոդի
Միջուկային շանտաժն այլևս չի ազդի Հնդկաստանի որոշումների վրա երկրի անվտանգության ապահովման ոլորտում։ Այս մասին հայտարարել է Հնդկաստանի վարչապետ Նարենդրա Մոդին՝ ելույթ ունենալով Հնդկաստանի անկախության օրվա կապակցությամբ։
«Հնդկաստանն որոշել է, որ չի հանդուրժի միջուկային շանտաժը։ Միջուկային շանտաժը շարունակվում է երկար ժամանակ, բայց դա մենք երբեք չենք ընդունի։ Մենք որոշել ենք, որ ահաբեկիչներն ու նրանց ընկերները չեն խնայվի։ Մենք չենք զիջի միջուկային ճնշմանը», - հավելել է Մոդին։
Անդրադառնալով Պահալգամի հարձակմանը և երկրի արձագանքին՝ «Սինդուր» գործողությանը, Հնդկաստանի վարչապետն ասել է, որ կառավարությունը զինված ուժերին ազատ ձեռքեր է տվել։
«Նրանք են որոշում ռազմավարությունը, թիրախը և ժամկետները։ Մեր զորքերն արել են այն, ինչ ոչ ոք չի արել տասնամյակներ շարունակ։ Մենք հարյուրավոր կիլոմետրեր ենք ներթափանցել թշնամու տարածք և հողին ենք հավասարեցրել ահաբեկիչների շտաբը», - ասել է նա։
Հիշեցնենք՝ ապրիլի 22-ին Ջամմու և Քաշմիր Հնդկաստանի միութենական տարածքում՝ Փահալգամում, տեղի ունեցավ ահաբեկչական հարձակում։ Զոհվեցին Հնդկաստանի քսանհինգ քաղաքացի և մեկ նեպալցի։ Հնդկաստանը հայտարարել էր, որ ունի ապացույցներ, որ Պակիստանի միջգերատեսչական հետախուզությունը ներգրավված է եղել հարձակման մեջ։ Մայիսի 7-ի գիշերը հնդկական ուժերը սկսեցին «Սինդուր» գործողությունը՝ հարվածելով Պակիստանում գտնվող թիրախներին, որտեղ գտնվում էին ահաբեկիչները։ Պակիստանը հակահարված տվեց։ Մայիսի 10-ին երկու կողմերն էլ հայտարարեցին լիակատար հրադադարի մասին։ Հնդիկ պաշտոնյաները հայտարարեցին, որ «Սինդուր» գործողությունը կասեցվել է, բայց չի ավարտվել։
