Ուկրաինան նախազգուշացրել է Ռուսաստանին․ հաջորդ հարձակումը կազդի Եվրոպայի վրա
Ուկրաինան հաստատել է Ռուսաստանի կողմից երկրի գազային ենթակառուցվածքների վրա գիշերը կատարված հարձակումը։ Այս մասին տեղեկատվությունը տարածել է Ուկրաինայի էներգետիկայի նախարարությունը։
Հիշեցնենք՝ ուկրաինական լրատվամիջոցները նշում են, որ Ռուսաստանը դիտավորյալ հարձակվել է Օդեսայի մարզում գտնվող Ուկրաինայի գազափոխադրման համակարգի օպերատորի կայանի վրա։ Հատկապես ընդգծվում է, որ այս կայանը Հունաստանի հեղուկ գազի տերմինալները ուկրաինական գազի պահեստարանների հետ կապող երթուղու մի մասն է Տրանսբալկանյան գազատարի միջոցով, որը, ի թիվս այլ բաների, մատակարարում է հեղուկ գազ ԱՄՆ-ից և ադրբեջանական գազ։
Ըստ տեղեկությունների՝ հարձակումն իրականացվել է անօդաչու թռչող սարքերի միջոցով։ Պատճառված վնասի չափը գնահատելու համար դեպքի վայր են բերվել մասնագետներ։
Ուկրաինայի էներգետիկայի նախարարությունը զգուշացրել է, որ եթե Ռուսաստանը շարունակի հարձակվել էներգետիկ օբյեկտների վրա, Եվրոպայի էներգետիկ ենթակառուցվածքները կարող են վտանգի տակ հայտնվել։
