Վրաստանը կնպաստի Հայաստանի և Ադրբեջանի միջև երկխոսությանը․ Կոբախիձե

Վրաստանի վարչապետ Իրակլի Կոբախիձեն Թուրքմենստանում ՄԱԿ-ի համաժողովի շրջանակներում հանդիպել է Հայաստանի նախագահ Վահագն Խաչատուրյանի հետ։  Վրաստանի կառավարության տվյալներով՝ հանդիպմանը քննարկվել են Վրաստանի և Հայաստանի միջև բարեկամական հարաբերություններն ու ռազմավարական գործընկերությունը, տարբեր ոլորտներում հաջող համագործակցությունն, ինչպես նաև տարածաշրջանում ընթացող գործընթացները։

«Հանդիպման ընթացքում հատուկ ուշադրություն է դարձվել Հարավային Կովկասում խաղաղության և կայունության կարևորությանը։ Վարչապետը ընդգծել է, որ խաղաղության համաձայնագրի շուրջ բանակցությունների ավարտի վերաբերյալ Հայաստանի և Ադրբեջանի համատեղ հայտարարությունը կարևոր քայլ է այս ուղղությամբ։

Իրակլի Կոբախիձեն նաև հաստատել է Վրաստանի կառավարության պատրաստակամությունը՝ նպաստելու երկխոսությանը և այդպիսով ապահովելու տարածաշրջանում երկարատև խաղաղություն և կայունություն», - ասվում է հայտարարության մեջ։