Զախարովան՝ Իրանի միջուկային օբյեկտները ռմբակոծելու սպառնալիքների մասին

Իրանին նոր հարվածներ հասցնելու պարբերական սպառնալիքները չեն կարող լուրջ մտահոգություն չառաջացնել, միջուկային օբյեկտներին հարվածելու ռիսկերը չի կարելի անտեսել, այս մասին հայտարարել է ՌԴ Արտաքին գործերի նախարարության պաշտոնական ներկայացուցիչ Մարիա Զախարովան, գրում է «Ռիա Նովոստի»-ն:

«Չեն կարող լուրջ մտահոգություն չառաջացնել Իրանի հասցեին պարբերաբար հնչող սպառնալիքները՝ նոր հրթիռահրետանային հարվածներ հասցնել նրա միջուկային օբյեկտներին։

Նման հայտարարություններին ցինիզմ է ավելացնում այն փաստն, որ դրանք հնչում են միջուկային զենքի չտարածման մասին մտացածին մտահոգության քողի տակ։ Միջուկային օբյեկտների ռմբակոծումը չպետք է դառնա սովորական բան, այլ կերպ ասած միջազգային պրակտիկայի առօրյան։ Դրա հետ կապված աղետալի ռիսկերը չի կարելի ոչ անտեսել, ոչ էլ առավել ևս արդարացնել», - ասել Է Զախարովան ճեպազրույցի ժամանակ։