Մոսկվան միջոցներ կձեռնարկի՝ պատժամիջոցներին հակազդելու համար․ Զախարովա

Ռուսաստանը տեսնում է, որ Արևմուտքը չի կարող «անջատվել» պատժամիջոցների թեմայից, Մոսկվան միջոցներ է ձեռնարկում դրանց հակազդելու համար, հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան, այս մասին հայտնում է «ՏԱՍՍ»-ը։

«Մենք տեսնում ենք, որ Արևմուտքը պարզապես չի կարողանում հրաժարվել պատժամիջոցների թեմայից։ Թվում է, թե դրանք անընդհատ ձգձգվում են։ Ըստ երևույթին, այլ տարբերակներ չեն մնացել՝ դրանք ոչնչացվել են։ Միևնույն ժամանակ, մենք արձագանքում ենք և միջոցներ ենք ձեռնարկում՝ այս ամենին դիմադրելու կամ նույնիսկ այն մեր սեփական շահերին ուղղորդելու, օգտագործելու համար», - ասել է ՌԴ արտգործնախարարության պաշտոնական ներկայացուցիչը։

Ինչպես նշել է Զախարովան, կասկած չկա, որ հակառուսական պատժամիջոցների սահմանումը հարված է հասցնում նաև համաշխարհային տնտեսությանը։