Թե՛ Ամերիկան, թե՛ Իսրայելը չհասան իրենց ուզածին, ուստի հրադադար խնդրեցին․ Իրանի ԱԳՆ

Ամերիկացի և իսրայելցի պաշտոնյաների հռետորաբանությունը որևէ վստահության արժանի չէ, Իրանը պատրաստ է հետ մղել Միացյալ Նահանգների և Իսրայելի կողմից հնարավոր նոր հարձակումը: Այս մասին հայտարարել է Իսլամական Հանրապետության զինված ուժերի գլխավոր շտաբի պետ, գեներալ-լեյտենանտ Աբդուլրահիմ Մուսավին, գրում է «Ռիա Նովոստի»-ն:

«Մենք չենք վստահում ԱՄՆ-ի և սիոնիստական ռեժիմի (Իսրայելի) խոսքերին ու խոստումներին, մենք լիովին պատրաստ ենք ապագայում հետ մղել նրանց հարձակումը», -  ասել է գեներալը։

Նա նշել է, որ ԱՄՆ-ն և Իսրայելն Իրանի հետ զինված հակամարտության ժամանակ համաշխարհային հանրությանը ցույց տվեցին, որ չեն պատրաստվում պահպանել միջազգային իրավունքը։

«Թշնամին լուրջ կորուստներ կրեց և չհասավ իր նպատակներին, ուստի հրադադար խնդրեց՝ սիոնիստական ռեժիմը փրկելու համար», - հավելել է նա։

Հավելենք՝ ավելի վաղ ԱՄՆ նախագահ Դոնալդ Թրամփը հայտարարել էր իր պատրաստակամության մասին կրկին հարվածել Իրանի միջուկային օբյեկտներին, եթե կարծի, որ Իրանը ձգտում է վերականգնել իր ներուժը: Իսլամական Հանրապետության արտաքին գործերի նախարարության ղեկավար Աբբաս Արաղչին խոստացել էր, որ Թեհրանը վճռական պատասխան կտա կրկնվող ագրեսիայի դեպքում: