Հայաստանում արգելվել է խաղատների գովազդը երկրի մուտքի մոտ և հյուրանոցներում

Խաղատների և խաղային կայքերի գովազդն արդեն կթույլատրվի միայն համապատասխան հաստատություններում և գրասենյակներում: Օնլայն խաղատների տուրքերը երկու անգամ կավելանան. ԱԺ–ն ընդունել է «Գովազդի մասին» օրենքում կատարված փոփոխությունների օրինագիծը:

Օրինագծի նախաձեռնողը «Քաղաքացիական պայմանագիր» խմբակցության պատգամավոր Նարեկ Ղահրամանյանն էր:

Նախկին կարգավորումների համաձայն` խաղատների և խաղերի առցանց հարթակների գովազդը թույլատրվում էր միայն խաղային հաստատություններում, ցամաքային և օդային անցակետերում, ինչպես նաև չորսաստղանի և ավելի բարձր կարգի հյուրանոցներում:

Նոր կարգավորումներով` գովազդը կթույլատրվի բացառապես խաղային ընկերությունների շենքերի ճակատային մասերին և հենց գրասենյակներում։

«Նույնիսկ սահմանափակ ձևաչափով նման պրակտիկան բացասական ազդեցություն է ունենում երկրի իմիջի վրա, հատկապես պատկառելի օտարերկրյա հյուրերի աչքում»,- ասել  Ղահրամանյանը:

Փոփոխություններն ուժի մեջ կմտնեն պաշտոնական հրապարակումից 10 օր հետո: