Հայաստանում զբոսաշրջիկների թիվը նվազել է

Հայաստանում այս տարվա առաջին եռամսյակում զբոսաշրջիկների թիվը նվազել է 11.3%-ով կամ շուրջ 49 հազարով: Այս մասին Radar Armenia-ն տեղեկանում է ՀՀ վիճակագրական կոմիտեից։

2025 թվականի հունվար-մարտ ամիսներին Հայաստան է եկել 386․741 զբոսաշրջիկ, իսկ նախորդ տարվա նույն ժամանակահատվածում՝ 435․775։

Զբոսաշրջիկների մեծ մասը՝ 37.3%-ը կամ 144 հազարը եղել են ՌԴ քաղաքացիներ։ Այնուամենայնիվ, ՌԴ քաղաքացիների թվի տեսակարար կշիռը Հայաստան եկած զբոսաշրջիկների մեջ նվազել է։ Եթե նախորդ տարվա նույն ժամանակահատվածում ՀՀ եկած զբոսաշրջիկների 42.3%-ն էր ՌԴ քաղաքացի, այս տարի՝ 37.3%-ը։

Ըստ քաղաքացիության՝ հաջորդում է Հայաստանը (այսինքն, Հայաստանի քաղաքացիները, որ գալիս են որպես զբոսաշրջիկ)։ Նրանց թիվն այս տարի 76․861 է եղել՝ նախորդ տարվա 75․483-ի փոխարեն։

Երրորդ տեղում Վրաստանի քաղաքացիներն են՝ 59․624 զբոսաշրջիկ նախորդ տարվա 61․830-ի փոխարեն, կամ զբոսաշրջիկների ընդհանուր թվի 15.4%-ը։

Դրան էլ հաջորդում է Իրանը՝ 34․369 զբոսաշրջիկ նախորդ տարվա 33․729-ի փոխարեն, կամ զբոսաշրջիկների ընդհ․ թվի 8.9%-ը։

Կան երկրներ, որտեղից նախորդ տարվա առաջին եռամսյակում զբոսաշրջիկներ չեն եղել, այս տարի այցելել են Հայաստան։ Օրինակ՝ Զամբիան՝ 1, Լաոս՝ 1, Տանզանիա՝ 2, Սենթ Լյուսիա՝ 1, Միեռե Լեոնե՝ 3, Սուդան՝ 1 զբոսաշրջիկ։