Պակիստանից նշել են՝ երբ է Հնդկաստանը մտադիր հարված հասցնել

Պակիստանը հավաստի տվյալներ ունի, որ Հնդկաստանը մտադիր է ռազմական գործողություններ սկսել առաջիկա 24-36 ժամերի ընթացքում։ Այս մասին հայտնել է Պակիստանի տեղեկատվության նախարար Աթաուլա Թարարը X սոցցանցում։

«Պակիստանը հավաստի տեղեկություններ ունի այն մասին, որ Հնդկաստանը մտադիր է գործողություններ սկսել առաջիկա 24-36 ժամվա ընթացքում։ Հարվածի համար պատրվակ կդառնան «անհիմն և շինծու մեղադրանքները», թե Պակիստանը հանցակից է Պահալգամի ահաբեկչությանը»- գրել է նա:

Նախարարն ասել է․ «Տարածաշրջանում որպես դատավոր, երդվյալ ատենակալ և դահիճ Հնդկաստանի հանդուգն դերը անխոհեմ է և լիովին անընդունելի: Պակիստանն ինքը դարձել է ահաբեկչության զոհ և շատ լավ հասկանում է, թե դա ինչ է: Մենք միշտ դատապարտել ենք ահաբեկչությունն իր բոլոր ձեւերով եւ դրսեւորումներով աշխարհի ցանկացած կետում»։ 

Թարարի խոսքով՝ Իսլամաբադն առաջարկել է միջադեպի հետաքննություն անցկացնել փորձագիտական ​​չեզոք հանձնաժողովի մասնակցությամբ։ Միևնույն ժամանակ, նրա խոսքով, Հնդկաստանը «կարծես թե որոշել է բռնել իռացիոնալության և առճակատման վտանգավոր ուղին, որը աղետալի հետևանքներ կունենա ողջ տարածաշրջանի համար եւ նրա սահմաններից դուրս»:

«Պակիստանը կրկին հայտարարում է, որ Հնդկաստանի ցանկացած նման ռազմական միջամտություն կարժանանա խիստ եւ վճռական պատասխանի։ Միջազգային հանրությունը պետք է հասկանա, որ էսկալացիայի և դրա հետեւանքների պատասխանատվությունն ամբողջությամբ կրում է Հնդկաստանը»,- ընդգծել է Թարարը։