Բնակչության ավելացում չունենք, փոխարենը տրանսպորտային միջոցների քանակն է ավելանում

Հայաստանի բնակչությունը գրեթե չի ավելանում կամ չնչին ավելացում ունենք, բայց տրանսպորտային միջոցների քանակը վերջին մի քանի տարիների ընթացքում կրկնապատկվել է։ Այս մասին ԱԺ-ում ճանապարհային երթևեկության անվտանգությունը թեմայով լսումների ժամանակ հայտարարել է Պաշտպանության և անվտանգության հարցերի մշտական հանձնաժողովի նախագահի տեղակալ Արմեն Խաչատրյանը։

«Բնակչության ավելացում չունենք, բայց տրանսպորտային միջոցների քանակը ավելանում է։ Ինչու է ավելանում տրանսպորտային միջոցների քանակը Հայաստանում, որովհետև չկա՝ պատշաճ, կանխատեսելի, հարմարավետ հասարակական տրանսպորտ, այսինքն մարդիկ տեղաշարժվելու համար առաջին բանը, որ մտածում են անվտանգ, թեկուզ էժանագին տրանսպորտային միջոցով, ժամանակին տեղ հասնելն է։ Մենք պետք է ունենանք այնպիսի հասարակական տրանսպորտ, որ անգամ ավտոտնակում 2 կամ 3 մեքենա ունենալու դեպքում  հիմնականում օգտվենք, հասարակական տրանսպորտից»,- հայտարարել է Խաչատրյանը։