ՄԱԿ–ը Գազայում Իսրայելի գործողությունները ցեղասպանություն է անվանել
Իսրայելի կողմից Գազայի հատվածում էլեկտրաէներգիայի անջատումները, ինչպես նաև հրեական պետությանը զենքի շարունակական մատակարարումը և Նեթանյահուի կառավարության դեմ պատժամիջոցների բացակայությունը ցեղասպանություն է Պաղեստինի դեմ: Այս մասին հայտարարել է ՄԱԿ-ի հատուկ զեկուցող Ֆրանչեսկա Ալբանեզեն։
«Գազայի հատվածին էլեկտրամատակարարման դադարեցումը, ի թիվս այլ բաների, նշանակում է աղազերծման կայանների դադարեցում և, հետևաբար, մաքուր ջրի մատակարարման կանգ», - գրել է նա X սոցիալական ցանցում:
Հատուկ զեկուցողը նաև պնդում է, որ այն երկրները, որոնք աջակցում են Իսրայելին՝ նրան զենք մատակարարելով և հավանություն տալով նրա ռազմական գործողություններին անկլավի դեմ, մեղսակից են Պաղեստինի ժողովրդի ցեղասպանությանը։
Իսրայելի կառավարությունը նախօրեին կարգադրել է դադարեցնել Գազայի հատվածի էլեկտրամատակարարումը։ Տեղական լրատվամիջոցները, մեկնաբանելով իրադարձությունը, նշել են, որ Իսրայելից մատակարարվող էլեկտրաէներգիան օգտագործվել է միայն աղազերծման կայանի սնուցման համար, իսկ մնացած բոլոր օբյեկտները սնուցվում են գեներատորներով։ Սակայն լրագրողները հայտնել են, որ անկլավը գրեթե մեկ շաբաթ է, ինչ վառելիք չի ստացել նույն այդ գեներատորների համար։
Մի քանի օր առաջ Իսրայելը դադարեցրել էր մարդասիրական օգնության մատակարարումները Գազայի հատված։ Դա պայմանավորված էր ՀԱՄԱՍ շարժման կողմից ԱՄՆ նախագահի հատուկ բանագնաց Սթիվեն Վիտկովի առաջարկած հրադադարի նոր պլանը ընդունելուց հրաժարվելու պատճառով։
