«Հետ կանգնելու» միտում չկա. Խանդանյան

Պարզ տեխնիկական հարց է «ԵՄ-ին Հայաստանի անդամակցելու գործընթացի մեկնարկի մասին» օրենքի նախագծի երկրորդ ընթերցմամբ քվեարկությունը հետաձգելը։ Այս մասին, այսօր՝ մարտի 4-ին, Ազգային ժողովում լրագրողների հետ ճեպազրույցի ընթացքում ասաց ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը։

«Դա վերաբերում է նախագծի իրավական տեխնիկային. կառավարությունն արել է առաջարկներ, և երեկ պարզվեց, որ նախաձեռնությունը ներկայացնողները հակված չեն ընդունելու առաջարկությունները։ Դրա պատճառով քվեարկությունն ընդմիջվեց։ Ապագայում այն կվերսկսի՝ մինչև կձևավորվի կոնսենսուս մեր և նախաձեռնողների միջև»,- ասել է նա։

Նա նշել է, որ նախագծից «հետ կանգնելու» միտում չկա. «Մենք հակված ենք նախագիծն ընդունելուն»։

Հիշեցնենք՝ ՀՀ ԱԺ եվրոպական ինտեգրման հարցերի մշտական հանձնաժողովը հրավիրած արտահերթ նիստում երկրորդ ընթերցմամբ քննարկել է «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը: ՀՀ արտաքին գործերի նախարարի տեղակալ Պարույր Հովհաննիսյանը, ներկայացնելով կառավարության դրական դիրքորոշումը, նշել է, որ գործադիրն ունի մի քանի առաջարկ՝ իրավական տեխնիկայի վերաբերյալ: Օրենքի նախագծի քվեարկությունը հետաձգվել է: