Կյանքը սև ու սպիտակ չէ, բազմաթիվ ռիսկեր կան. ֆինանսների նախարար

Բազմաթիվ ռիսկեր կան. Մենք շատ տարբեր հաշվարկներ ունենք, որոշ հաշվարկներ ունենք նաև այդ հարցերի հետ կապված, բոլոր ռիսկերը գնահատում ենք և հաշվում ենք։ Այս մասին ԱԺ-ում լրագրողների հետ զրույցում հայտնել է ֆինանսների նախարար Վահե Հովհաննիսյանը՝ անդրադառնալով հարցին, թե արդյոք Հայաստանի օրակարգում կա ԵԱՏՄ-ից դուրս գալու հարցը եւ հաշվարկե՞լ են արդյոք, թե ինչ կլինի, եթե Հայաստանը դուրս գա ԵԱՏՄ-ից՝ հաշվի առնելով ՌԴ-ի հետ մեր տբնտեսության կապվածությունը:

«Մենք տարբեր սցենարներ ենք քննարկում, մեր աշխատանքային պրակտիկան է գնահատել բազմաթիվ տարբեր ռիսկեր և մենք ունենք վերլուծություններ, թե ինչ կլինի այս կամ այն պարագայում: Բայց դրա մասին խոսելը անիմաստ է և տեղին չի, դա մեր աշխատանքային պրակտիկան է»,-հավելել է նա:

Հարցին, ո՞րն է ավելի լավ մնալ ԵԱՏՄ-ում, թե դուրս գալ ու կողմնոորոշվել դեպի ԵՄ, ԱՄՆ, նա պատասխանեց. «Կյանքը սև ու սպիտակ չէ, բազմաթիվ հանգամանքներ կան, որոնք պետք է հաշվի առնենք ցանկացած որոշում ընդունելուց:

ԵԱՏՄ-ից դուրս գալու դեպքում, այո, ռիսկեր կլինեն: Դա շատ ակնհայտ է. քանի որ մեր արտահանումը մեծ մասը գնում է ԵԱՏՄ, ապա ԵԱՏՄ-ից դուրս գալը կունենա իր ռիսկերը, եթե դա տեղի ունենա այսօր։ Ես չգիտեմ՝ ինչ քայլերի կդիմի ՌԴ-ն, բայց տարբեր քայլերի դիմելու դեպքում տարբեր ռիսկեր կլինեն»,-նշել է նա:

Հարցին՝ ի՞նչ է անում Հայաստանը, որ մեր ապրանքները ավելի մրցունակ դառնան եվրոպացիների համար, նախարարը պատասխանել է. «Հիմա խթանման ծրագիր ենք նախապատրաստում, և դա ոչ միայն վերաբերում է ԵՄ-ին: Մենք արդեն երկու տարի է՝ աշխատում ենք այն ուղղությամբ, որ դիվերսիֆիկացնենք մեր արտահանումը տարբեր գործիքներով: Հիմա էլ էլի մի նախաձեռնություն կա, որը քննարկում ենք կառավարությունում, շուտով հայտի կդառնա»:

Ինչ վերաբերում է ՌԴ-ի սուր արձագանքին, երբ Հայաստանը հայտարարում է եվրաինտեգրման մասին, նախարարն ասել է. «Դա շատ ակնհայտ պատասխան ունի, որովհետև Եվրոպայի և Ռուսաստանի հարաբերությունները լարված են և ցանկացած նման բան կարող է առաջացնել նման սուր ռեակցիա: Այն, ինչ կառավարության կողմից ընդունվել է, այն մասին է, որ կարելի է այդ ուղղությամբ մտածել, այսինքն գնալ ԵՄ անդամակցության ճանապարհով, բայց այդ ճանապարհը, թե որքան կտևի և ոնց կգնա, չգիտենք: Այդ ճանապարհով մենք վաղուց ենք գնում»: