Ռուսական ակտիվները կմնան սառեցված. ԵՄ
Եվրոպացի առաջնորդները հայտարարել են, որ ԵՄ-ում Ռուսաստանի ինքնիշխան ակտիվները սառեցված կլինեն այնքան ժամանակ, քանի դեռ չի ավարտվել ուկրաինական հակամարտությունը և չի վճարվել վնասի «փոխհատուցումը», ասվում է Բրյուսելում ԵՄ գագաթնաժողովի եզրակացությունների մեջ:
«Եվրոպական օրենսդրության համաձայն՝ ռուսական ակտիվները կմնան անշարժացված մինչև Ուկրաինայի դեմ ռուսական ագրեսիայի ավարտը և հասցված վնասի փոխհատուցումը»,- ասվում է փաստաթղթում։
Այս շաբաթվա սկզբին արևմտյան լրատվամիջոցները հայտնել էին, որ Եվրամիությունն ուսումնասիրում է Ռուսաստանի Կենտրոնական բանկի սառեցված ակտիվների հնարավոր բռնագրավման և Կիևի կողմից դրանք օգտագործելու հետևանքները։
Ենթադրվում է, որ ԵՄ արտաքին գործերի գործակալությունը և ԵՄ որոշ անդամ երկրներ վերանայում են, թե արդյոք որոշումներ կպահանջվեն սառեցված ակտիվների բռնագրավման համար իրավական դաշտ ստեղծելու համար, և որոշ երկրներ մտածում են, թե ինչպես դա կարող է ազդել եվրոյի վրա:
