Երկար տարիներ վարվող քաղաքականության հետևանքով սպիտակ գենոցիդ ենք անում․ Բաբայան

Ոչ մի բարեփոխում չկա, չեն էլ հասկանում ինչ անեն: Այս մասին Hetq.am-ի հետ զրույցում ասել է «Միասնական հայրենիք» կուսակցության նախագահ, Արցախի պաշտպանության բանակի նախկին հրամանատար Սամվել Բաբայանը՝ պատասխանելով բանակում տեղի ունեցող փոփոխություններին:

Անդրադառնալով զենքերի ձեռքբերմանը՝ Բաբայանն ասել է, որ մենք ունենք մարդկային ռեսուրսի խնդիր․ ֆրանսիական հրետանու համար օրինակ 6 հոգի մարդ պետք է աշխատեն:

«Նիկոկ Փաշինյանն առաջին պատասխանատուն է: Ինքն է սխալ կադրեր նշանակել բանակում, ինքն է այդ քաղաքականությունը վարել: Ոչ մեկը չի ասում, որ նա մեղավոր չէ»,- ասել է նա:

«Երկար տարիներ վարվող քաղաքականության հետևանքով սպիտակ գենոցիդ ենք անում, երիտասարդները թողնում լքում են երկիրը, որովհետև 18 տարեկան երեխան այսօր տանել մի ամիս պարապելուց հետո տանել առաջին գիծ, զոհաբերել, սխալ եմ համարում: Վաղուց առաջարկել եմ, որ պետք է դարձնել մի տարի, երիտասարդը մեկ տարի ծառայի, պետությունն օրենք ունենա, որ նրան ոչ ոք իրավունք չունի առաջին գիծ տանելու»,- նշել է Բաբայանը:

Բաբայանն անդրադարձել է նաև Հայաստանի ներքաղաքական դաշտում տեղի ունեցող գործընթացներին, մասնավորապես՝ վերջին օրերին տեղի ունեցող պաշտոնանկություններին,  և նշել․ «Իշխող քաղաքական ուժը պատրաստվում է ընտրությունների և այդ հանումներով մեկնարկը տվեց, էլի են մարդիկ հանելու»: