«Պուտինի խոսքերը դատարկ չեն». Օրբանը զգուշացնում է
Արևմտյան երկրները պետք է շատ լուրջ վերաբերվեն Ռուսաստանի նախագահ Վլադիմիր Պուտինի հայտարարությանը, որը վերաբերում է Ուկրաինայի հակամարտությանը և ռուսական նոր բալիստիկ հրթիռի օգտագործմանը: Նման կարծիք է հայտնել Հունգարիայի վարչապետ Վիկտոր Օրբանը:
Նա նշել է, որ տարբեր երկրներում հանրային հաղորդակցությունները տարբեր կերպ են իրականացվում։ «Սակայն եթե Ռուսաստանում նախագահը ինչ-որ բան է ասում, ապա դրանք դատարկ խոսքեր չեն, սա հաղորդակցման հնարք չէ»,- ասել է Հունգարիայի կառավարության ղեկավարը։
Նա հիշեցրել է, որ Ռուսաստանն ունի «աշխարհի ամենահզոր բանակներից մեկը, որն ունի ամենաժամանակակից, ամենակործանարար զենքերը»։ Բացի այդ, Ռուսաստանը ճշգրտումներ է կատարել իր միջուկային դոկտրինում։
Նրա խոսքով, երբ Ռուսաստանը «փոխում է միջուկային զենքի կիրառման կանոնները, դա հաղորդակցման տեխնիկա չէ, դա հետեւանքներ կունենա»։
Իր ելույթում Պուտինը նաև ասել է, որ «Ռուսաստանն իրեն իրավունք է համարում զենք օգտագործել այն երկրների ռազմական օբյեկտների դեմ, որոնք թույլ են տալիս իրենց զենքն օգտագործել ռուսական օբյեկտների դեմ»,- հիշեցրել է Օրբանը։
«Եթե Ռուսաստանը «ինչ-որ բան ասում է այս թեմայով, ապա դա հենց այդպես էլ պետք է ընկալվի»,- ասել է Հունգարիայի կառավարության ղեկավարը։
Այդ կապակցությամբ նա ընդգծել է, որ այն երկրները, որոնք ռազմական օգնություն են ցուցաբերում Ուկրաինային, պետք է խոհեմություն ցուցաբերեն։ «Անհրաժեշտ է գործել ողջախոհությամբ, այլապես կարող են խնդիրներ լինել»,- զգուշացրել է Օրբանը։
