ՏԵՍԱՆՅՈՒԹ․ Լուկաշենկոյի և Պրիգոժինի հեռախոսազրույցի ձայնագրությունը հայտնվել է համացանցում
Համացանցում հայտնվել է ձայնագրություն, որում, ինչպես նշվում է, արձանագրվել են Բելառուսի նախագահ Ալեքսանդր Լուկաշենկոյի և «Վագներ» մասնավոր ռազմական ընկերություն ղեկավար Եվգենի Պրիգոժինի բանակցությունները 2023 թվականի հունիսին տեղի ունեցած ապստամբության ժամանակ։
Ձայնագրության իսկությունը հաստատված չէ։ Դրան մասնակցում են երեք զրուցակիցներ՝ Լուկաշենկոյի մամուլի քարտուղար Նատալյա Էյսմոնտը, որը զրույցի սկզբում պատասխանում է հեռախոսազանգին, և երկու տղամարդիկ, ովքեր հիմնական երկխոսություն են վարում ապստամբությունն ավարտելու ծրագրի վերաբերյալ:
Հեռախոսազագից մեկ հատված․
Խոսնակ թիվ 1, տղամարդու ձայն. Ալլո Ժենյա, ես նրա հետ դեռ չեմ խոսել։ Նրա ամբողջ շրջապատը դեռ լարված է: Նրանք ինձ արդեն և համոզում են, և խնդրում։ Դե, մի քիչ էլ, մի քիչ էլ սպասեք։ Դե, դուք գիտեք այս իրավիճակը: Բայց մեր մամուլի ծառայությունը, նման բան արեց, գուցե և մեզ համար վնասակար հայտարարություն, որ մենք առավոտյան նախագահի հետ խոսել ենք, պայմանավորվել ենք, որ ամեն ինչ անելու ենք հակամարտության խաղաղ կարգավորման համար։ Եվ ես առաջարկեցի, որ մենք, որ ես կխոսեմ Եվգենի Պրիգոժինի հետ, և կփորձեմ լավ պայմանավորվել և այլն։
Խոսնակ 2. Այո:
Խոսնակ 1. - Այո, մենք մի շարք փուլեր ենք անցել, մի քանի բանակցություններ ենք անցկացրել և մշակել ենք այդ հարցի անարյուն լուծման միանգամայն ընդունելի տարբերակ։ Այսինքն, դե, ես արդեն որոշակիորեն հրահրում եմ ռուսական կողմին։ Գուցե նրանք այլ տարբերակներ ունեն: Միգուցե սպանել Պրիգոժինին: Տարբերակ է։ Ամենատարբեր բաներն են հնարավոր։
Հիշեցնենք, որ անցյալ տարվա հուլիսին տեղեկություն էր տարածվել, որ Գերմանիայի Դաշնային հետախուզական ծառայությունը գաղտնալսել է Ալեքսանդր Լուկաշենկոյի և Եվգենի Պրիգոժինի հեռախոսազրույցները 2023 թվականի հունիսի 24-ին։ Գերմանական ARD մեդիահոլդինգի նյութում ասվում էր, որ հետախուզական ծառայությունը գիտեր Լուկաշենկոյի՝ որպես միջնորդի դերի մասին։ Ի պատասխան լրագրողների հարցմանը, հետախուզական ծառայությունն ասել է, որ հրապարակավ չի մեկնաբանում իր գործունեությունը:
Լուկաշենկոյի վարկածի համաձայն՝ ապստամբության ժամանակ Պուտինը պնդել է, որ Պրիգոժինին զանգելն անօգուտ է, և նա չի վերցնում հեռախոսը։
Հիշեցնենք՝ 2023 թվականի հունիսի 24-ին Կրեմլը հայտարարեց, որ Պրիգոժինը կմեկնի Բելառուս։ 2023 թվականի հունիսի 26-ին Վլադիմիր Պուտինը հայտարարեց, որ «Վագներ»-ի մարտիկները կարող են պայմանագիր կնքել Ռուսաստանի Պաշտպանության նախարարության հետ կամ մեկնել Բելառուս։ Հունիսի 27-ին Լուկաշենկոն հայտարարել էր, որ Պրիգոժինը գտնվում է Բելառուսում։
Պրիգոժինը պնդում էր, որ Լուկաշենկոն ձեռք է մեկնել և առաջարկել է լուծումներ գտնել օրինական իրավասության մեջ մասնավոր ռազմական ընկերության հետագա աշխատանքի համար:
Մանրամասները՝ տեսանյութում։
