Թուրքիայում Աբխազիայի ներկայացուցչությունը հանդես է եկել կոչով

Թուրքիայում Աբխազիայի ներկայացուցչությունը կոչ է անում ընդդիմադիր ուժերին անհապաղ դադարեցնել անօրինական գործողությունները: Այս մասին  հայտնում է Աբխազիայի նախագահի տեղեկատվական կենտրոնը։

«Թուրքիայի Հանրապետությունում Աբխազիայի Հանրապետության լիազոր ներկայացուցիչը մտահոգություն է հայտնում Աբխազիայում  տիրող քաղաքական իրավիճակի վերաբերյալ և ընդդիմադիր ուժերին կոչ է անում անհապաղ դադարեցնել երկրում քաղաքական իրավիճակն ապակայունացնելուն ուղղված անօրինական գործողությունները», - ասել է Թուրքիայում Աբխազիայի լիազոր ներկայացուցիչ`Իբրահիմ Ավիձբան։

Ավիձբան նաև նշել է, որ վերջին օրերին դեսպանատունը բազմաթիվ դիմումներ է ստացել սփյուռքի ներկայացուցիչներից, որոնք հույս են հայտնում ստեղծված իրավիճակի շուտափույթ հանգուցալուծման` սահմանադրական ճանապարհով։

«Իշխանափոխության ցանկացած փորձ պետք է իրականացվի բացառապես գործող օրենսդրության շրջանակներում և հաշվի առնելով ժողովրդի կամքը՝ արտահայտված ազատ և արդար ընտրություններում»,- ընդգծել է լիազոր ներկայացուցիչը։