Սրբուհի Գալյանը նշանակվեց արդարադատության նախարար
Սրբուհի Գալյանը նշանակվել է ՀՀ արդարադատության նախարարի պաշտոնում։ Այս մասին տեղեկանում ենք ՀՀ նախագահի մամուլի ծառայությունից։
«Հիմք ընդունելով վարչապետի առաջարկությունը՝ համաձայն Սահմանադրության 131-րդ հոդվածի, ինչպես նաև «Կառավարության կառուցվածքի և գործունեության մասին» օրենքի 5-րդ հոդվածի 1-ին մասի` Սրբուհի Գալյանին նշանակել արդարադատության նախարար»,–ասվում է ՀՀ նախագահ Վահագն Խաչատուրյանի հրամանագրում։
Նշենք, որ Սրբուհի Գալյանը 32 տարեկան է։ Նախկինում եղել է արդարադատության նախարարի տեղակալ։ Մինչև արդարադատության նախարարի պաշտոնում նշանակվելը գլխավոր դատախազի տեղակալն էր և վերահսկում էր ապօրինի գույքի բռնագանձման հետ կապված գործերը։
Հիշեցնենք` ԱԺ «Քաղաքացիական պայմանագիր» խմբակցությունում ստորագրահավաք էր սկսվել արդարադատության նախկին նախարար Գրիգոր Մինասյանի պաշտոնանկության համար։ Դրան հաջորդեց արդարադատության նորանշանակ փոխնախարար Սիրվարդ Գևորգյանի հրաժարականը։
