Ագարակի սահմանակետը կհսկեն ՀՀ սահմանապահ զորքերը. ԱԱԾ տնօրեն
Նախնական պայմանավորվածություն է ձեռք բերվել, որ 2025 թվականի հունվարի 1-ից «Ագարակ» սահմանային վերահսկողության կետում ամբողջական սահմանային ծառայությունն իրականացվի ՀՀ սահմանապահ զորքերի կողմից։ Այս մասին լրագրողների հետ զրույցում հայտնել է ՀՀ ԱԱԾ տնօրեն Արմեն Աբազյանը՝ անդրադառնալով հայ-իրանական սահմանից ռուս սահմանապահների հնարավոր դուրսբերման մասին հարցին։
Աբազյանի խոսքով՝ ներկայումս հայ-իրանական սահմանին Հայաստանի և Ռուսաստանի միջև համատեղ ծառայության վերաբերյալ տեղի են ունենում քննարկումներ։
ԱԱԾ տնօրենը նաև խոսել է հայ-թուրքական սահմանը միայն հայկական ուժերի կողմից վերահսկելու հնարավորության մասին։
«Փուլային տարբերակով հնարավոր է, որ հայ սահմանապահները վերահսկեն հայ-թուրքական սահմանը, բայց ներկայում նման որոշում չկա»,- ասել է նա։
