Ալիևը հավատարիմ է կեղծված ընտրություններով իր իշխանությունը երկարաձգելու ավանդույթին․ Ադրբեջանի ազգային խորհուրդ

Ադրբեջանի ժողովրդավարական ուժերի ազգային խորհուրդը դիմել է միջազգային հանրությանը՝ կոչ անելով չճանաչել սեպտեմբերի 1-ին Ադրբեջանում կայացած արտահերթ խորհրդարանական ընտրությունների արդյունքները:

Խորհրդի հրապարակած հայտարարության մեջ ասվում է, որ սեպտեմբերի 1-ին ընտրությունների նշանակումը հակասահմանադրական էր, դրանք անցկացվել են ազնիվ քաղաքական մրցակցության բացակայության պայմաններում: Ընտրական օրենսդրության փոփոխությունների ուղղությամբ իշխող ռեժիմի շահերին համապատասխան քայլեր չեն ձեռնարկվել:

Իշխանությունները թույլ չեն տվել ԵԽԽՎ պատվիրակությանը դիտորդական առաքելություն իրականացնել ընտրություններում և արգելել են Վեհաժողովի 76 անդամների մուտքն Ադրբեջան:

Խորհրդի տվյալներով՝ ընտրություններն անցկացվել են 13-ի լրագրողների ձերբակալությունների և բանտարկության ֆոնին, ովքեր ունեցել են ընտրությունների լուսաբանման մասնագիտական փորձ, ընտրողների մեծամասնությունը չի մասնակցել ընտրություններին, իսկ նրանք, ովքեր եկել են քվեարկելու, ներգրավվել են վարչական ռեսուրսի միջոցով:

«Իլհամ Ալիևը հավատարիմ է մնացել կեղծված ընտրությունների միջոցով իր իշխանությունը երկարաձգելու ավանդույթին։ Այդ պատճառով Ազգային խորհուրդը որոշել է բոյկոտել կեղծված ընտրությունները», - ասված է խորհրդի հաղորդագրության մեջ։

Ազգային խորհուրդը կոչ է անում ժողովրդին ակտիվորեն պայքարել նոր ժողովրդավարական ընտրությունների անցկացման համար, իսկ միջազգային հանրությանը չճանաչել ընտրությունների կեղծ արդյունքները, ինչպես նաև դատապարտել ընտրակեղծիքների գործընթացը: