Ովքե՞ր են գլխավորում խոշոր հարկատուների ցուցակը
ՀՀ ՊԵԿ-ը հրապարակել է այս տարվա առաջին եռամսյակի 1000 խոշոր հարկատուների ցանկը։
Ըստ այդմ, խոշոր հարկատուների ցուցակը գլխավորում է «Մոբայլ սենթր արթ» ՍՊԸ-ն, որը վճարել է 19 մլրդ 907 մլն 415 հազար դրամի հարկ։ Նախորդ տարվա նույն ժամանակահատվածում այս ընկերությունը 6-րդ հորիզոնականն էր զբաղեցնում՝ վճարելով 5 մլրդ 339 մլն 559 հազար դրամ։
2-րդ տեղում «Գազպրոմ Արմենիա» ընկերությունն է, որ վճարել է 18 մլրդ 162 մլն 346 հազար դրամ. 2023-ին «Գազպրոմ Արմենիա»-ն գլխավորում էր խոշոր հարկատուների ցանկը։
3-րդ տեղում Զանգեզուրի պղնձամոլիբդենային կոմբինատն է՝ 15 մլրդ 626 մլն 783 հազար դրամ հարկով։ Այս ընկերությունը նախորդ տարի երկրորդ տեղում էր։
4-րդ տեղում «Գրանդ տոբակո» ընկերությունն է, որ վճարել է 13 մլրդ 215 մլն 530 դրամ։
5-րդ տեղում «Փրիթի ուեյ» ՍՊԸ-ն՝ «Վեստա» խանութների ցանցը, որ այս տարի մուծել է 8 մլրդ 810 մլն 850 հազար դրամ։
