Պենտագոնը քննարկում է Կիևում դեսպանատուն լրացուցիչ ռազմական խորհրդականներ ուղարկելու տարբերակը: Այս մասին հայտնել է ԱՄՆ պաշտպանության նախարարության ներկայացուցիչ Պատրիկ Ռայդերը: Նրա խոսքով՝ նրանք խորհրդատվություն և աջակցություն կցուցաբերեն Ուկրաինայի կառավարությանը և զինված ուժերին, բայց չեն կատարի ռազմական պարտականությունները: Politico-ի աղբյուրների փոխանցմամբ ՝ խոսքը կարող է գնալ մինչեւ 60 մարդ ուղարկելու մասին։ 

«Հակամարտության ողջ ընթացքում պաշտպանության նախարարությունը վերանայել և ճշգրտել է մեր ներկայությունը երկրում՝ կախված անվտանգության պայմաններից։ Ներկայումս մենք դիտարկում ենք մի քանի լրացուցիչ խորհրդականներ ուղարկելու հնարավորությունը՝ դեսպանատանը ռազմական համագործակցության հարցերով բաժինն ընդլայնելու համար»,— Politico-ին ասել է պարոն Ռայդերը։

Պենտագոնի ներկայացուցիչը նշել է, որ դեսպանատան ռազմական համագործակցության բաժինը գտնվում է դիվանագիտական առաքելության ղեկավարի ղեկավարությամբ, թեեւ համալրված է Պաշտպանության նախարարության աշխատակիցներով: Ռայդերը հրաժարվել է անձնակազմի թիվն անվանել «գործառնական անվտանգության և ուժերի պաշտպանության նկատառումներից ելնելով»:

Politico-ի աղբյուրները հայտնել են, որ դեսպանատանը լրացուցիչ զինվորականներ են անհրաժեշտ լոգիստիկային աջակցելու եւ ԱՄՆ-ից ուղարկվող սպառազինությունների վերահսկման համար: Պարբերականի զրուցակիցներից մեկը պատմել է, որ լրացուցիչ ուժերը նաև կօգնեն ուկրաինացի զինվորականներին զենքի սպասարկման հարցում: Նշվում է, որ մի քանի ամերիկացի զինվորականներ արդեն ուղարկվել են Կիևի դեսպանատուն: ԱՄՆ Կոնգրեսի Ներկայացուցիչների պալատը նախօրեին՝ ապրիլի 20-ին, հավանություն է տվել Ուկրաինային Ռուսաստանի սառեցված ակտիվների փոխանցմանը և երկրին լրացուցիչ օգնության տրամադրմանը:

Աջակցության նոր փաթեթը Կոնգրեսում չէին կարողանում համաձայնեցնել 2023 թվականի աշնանից։