ԵՄ-ի արձագանքը Վրաստանի խորհրդարանի կողմից ընդունված «օտարերկրյա գործակալների» մասին օրինագծին
Վրաստանի խորհրդարանի կողմից առաջին ընթերցմամբ ընդունված «օտարերկրյա գործակալների» մասին օրինագիծը չի համապատասխանում ԵՄ նորմերին ու արժեքներին։ Այս մասին հայտարարել է ԵՄ արտաքին քաղաքականության և անվտանգության հարցերով բարձր ներկայացուցիչ Ժոզեպ Բորելը։
«Սա շատ մտահոգիչ զարգացում է, և այս օրենքի վերջնական ընդունումը բացասաբար կանդրադառնա Վրաստանի առաջընթացի վրա դեպի ԵՄ։
Այս օրենքը չի համապատասխանում ԵՄ հիմնական նորմերին և արժեքներին»,- ասված է հայտարարության մեջ։
Բորելի խոսքով՝ օրենքի ընդունումը կսահմանափակի քաղաքացիական հասարակության և լրատվամիջոցների հնարավորությունները։
Բորելը Վրաստանին կոչ է արել ձեռնպահ մնալ օրենքի ընդունումից։
Եվրոպական խորհրդի ղեկավար Շառլ Միշելը ևս հայտարարել է, որ ապրիլի 17-ին Վրաստանի խորհրդարանի ընդունած Օտարերկրյա գործակալների մասին օրենքը չի համապատասխանում երկրի եվրոպական նկրտումներին:
«Վրաց ժողովուրդն ընտրել է եվրոպական ուղին, ի պատասխան Եվրոպական խորհուրդն անցյալ տարվա դեկտեմբերին թեկնածուի կարգավիճակ շնորհեց Վրաստանին: Թույլ տվեք հստակություն մտցնել. օրինագիծը չի համապատասխանում ԵՄ-ին անդամակցելու Վրաստանի ձգտումներին և Վրաստանին ոչ թե կմոտեցնի, այլ կհեռացնի Եվրամիությունից»,- նշված է X սոցիալական ցանցում Շառլ Միշելի գրառման մեջ:
Հիշեցնենք, որ ավելի վաղ հաղորդել էինք, որ Վրաստանի խորհրդարանն առաջին ընթերցմամբ ընդունել է այսպես կոչված «օտարերկրյա գործակալների» մասին («Օտարերկրյա ազդեցության թափանցիկության մասին») օրենքի նախագիծը։
