Իսրայելը կօգնի Ադրբեջանին տիեզերք արձակել երկու արբանյակ

Ադրբեջանը նախատեսում է 2026 եւ 2028թթ. օպտիկական դիտարկման երկու արբանյակ արձակել տիեզերք։ Այս մասին լրագրողներին տեղեկացրել է Ադրբեջանի տիեզերական գործակալության (Ազերկոսմոս) վարչության նախագահ Սամեդդին Ասկերովը, հայտնել է ՏԱՍՍ-ը։

«Անցած տարի Բաքվում կայացած 74-րդ Միջազգային աստղագնացային կոնգրեսի շրջանակում ստորագրվել է պայմանագիր Ազերկոսմոսի եւ Israel Aerospace Industries-ի (IAI) միջեւ Ադրբեջանի նոր արբանյակների ստեղծման վերաբերյալ։ Azersky-2 ծրագրի շրջանակում կստեղծվեն երկու արբանյակներ։ Դրանք կլինեն Երկրի հեռահար ուսումնասիրման արբանյակներ՝ էլեկտրաօպտիկական առաջավոր սարքով»,- ասել է նա։

Նրա խոսքով՝ IAI-ն կնախագծի, կհավաքի, կինտեգրի եւ կփորձարկի առաջին արբանյակը ադրբեջանցի մասնագետների մասնակցությամբ։

«IAI-ն ծրագրի շրջանակում կապահովի անհրաժեշտ բոլոր երկրային համակարգերը՝ Ադրբեջանում Azersky-2 համակարգի կառավարման եւ շահագործման համար»,- նշել է Ասկերովը։ Նա ավելացրել է, որ կրող հրթիռը, որը կհասցնի առաջին արբանյակն ուղեծիր, հայտնի կդառնա առաջիկա ամիսներին։

Ադրբեջանը 2013թ. փետրվարին ուղեծիր է դուրս բերել Azerspace-1 առաջին հեռահաղորդակցային արբանյակը, 2014թ. հուլիսին արձակվել է Երկրի հեռահար ուսումնասիրման Azersky արբանյակը (2023թ. ապրիլին այն ավարտել է աշխատանքը ծրագրվածից մեկ տարի շուտ), իսկ 2018թ. սեպտեմբերին՝ Azerspace-2 հեռահաղորդակցային արբանյակը։