Վերջում հայտնի անեկդոտի նման չստացվի՝ «Վեոլիա ջրի» և եկեղեցու մասին. Ավինյան
Սա համապարփակ փոփոխությունների առաջին փուլն է, եւ այս փոփոխություններով մենք կրկնվող գործառույթներ ունեցող ստորաբաժանումները միավորում ենք, դարձնում մեկ ստորաբաժանում: Այս մասին այսօր Երեւանի ավագանու նիստի ժամանակ Երևանի քաղաքապետարանի և վարչական շրջանի ղեկավարի աշխատակազմերի կառուցվածքը, հաստիքացուցակը, աշխատակիցների թվաքանակը հաստատելու մասին նախագծի քննարկման ժամանակ հայտարարեց քաղաքապետ Տիգրան Ավինյանը:
«Մենք կարելի է ասել, օրինակ, ունենք X ծառայություն եւ Y ծառայություն: X ծառայությունն էլ կարող էր գնալ երեւանցուն տուգանել որեւէ իրավախախտման համար, հետո մի հատ էլ Y ծառայությունը կարող էր գնալ, տուգանել այդ նույն իրավախախտման համար: Մենք այս կրկնվող գործառույթները առաջին քայլով միավորում ենք: Ռիսկը այստեղ կարող է լինել այն, որ այս պրոցեսը շարունակական չլինի: Մեզ պետք է համապարփակ եւ ամբողջական կառուցվածքային փոփոխություններ իրականացնել, բայց արդեն ավելի խորքային»,-Նշեց Ավինյանը:
«Ազգային առաջընթաց» խմբակցության անդամ Տիգրան Պետրոսյանն ասաց, որ այսպիսի փոփոխությունների դեպքում պետք է ունենալ անցումային շրջանի մոնիտորինգի պլան և ռիսկերի մեղմացման պլան։
Ավինյանն ի պատասխան ասաց՝
«Իմ փորձից ելնելով ես կարող եմ մի բան փաստել, որ կրկնվող գործառույթներ ունեցող ստորաբաժանումները միշտ ավելի անարդյունավետ են, քան այդ գործառույթները միավորելը մեկ ստորաբաժանման մեջ: Սա կառավարման հստակ կանոն է: Ես չեմ ասում, որ ամբողջը միավորենք եւ վերջում հայտնի անեկդոտի նման ստացվի՝ «Վեոլիա ջրի» եւ եկեղեցու մասին, բայց շատ կոնկրետ նմանատիպ գործառույթներ ունեցող ստորաբաժանումները պետք է փուլ առ փուլ միավորենք եւ ստանանք այդ ոլորտի ծառայություններ: Ասենք հասարակական կարգի պահպանման մեկ ծառայություն պետք է ունենանք վերջում, հուսով եմ՝ հաջորդ տարի»,- մանրամասնեց նա:
