Ուկրաինան ավելի քան 400 միլիոն եվրո է կորցրել Լեհաստանի հետ սահմանին անցակետի շրջափակման պատճառով

Լեհ բեռնափոխադրողների կողմից լեհ-ուկրաինական սահմանի անցակետերի արգելափակման հետևանքով Ուկրաինայի տնտեսությանը հասցված վնասը կազմել է ավելի քան 400 միլիոն եվրո ( Խմբ.՝ ավելի քան 435 միլիոն դոլար): Այս մասին ասել է Ուկրաինայի Միջազգային ճանապարհային փոխադրողների ասոցիացիայի փոխնախագահ Վլադիմիր Բալինը:

«Իրավիճակն իսկապես կրիտիկական է: Ես պատրաստ չեմ ասել, թե ինչպես են տուժում մյուս արդյունաբերությունները, չնայած, ըստ Ուկրաինայի գործատուների դաշնության, մեր տնտեսությունն այսօր արդեն կորցրել է ավելի քան 400 միլիոն եվրո», - ասաց նա ճեպազրույցում: 

Բալինը հավելել է, որ յուրաքանչյուր ուկրաինացի բեռնափոխադրողի համար պարապուրդի հետևանքով շահութաբերության կորուստը կազմում է օրական 350 եվրո։

Նոյեմբերի 6-ից լեհական բեռնափոխադրողները արգելափակել են երեք հիմնական անցակետեր Ուկրաինայի հետ սահմանին։ Նրանք պահանջում են չեղարկել ԵՄ-ի կողմից տրված արտոնությունները Ուկրաինայի իրենց գործընկերներին, վերականգնել ուկրաինական առևտրային բեռնափոխադրումների պարտադիր լիցենզավորման նախկին ընթացակարգը և չեղարկել ուկրաինական տրանսպորտային ընկերություններին 2022 թվականի փետրվարի 24-ից հետո տրված թույլտվությունները։ Սահմանին բեռնատարների մի քանի կիլոմետրանոց հերթեր են գոյացել: Սահմանի արգելափակման պատճառով Լեհաստանից Ուկրաինա բեռների առաքման գներն աճել են ավելի քան երեք անգամ։ Նոյեմբերի 21-ին սլովակ փոխադրողները փակել են բեռնատարների անցումը Ուկրաինայի հետ սահմանին գտնվող «Վիսնե Նեմեցկե-Ուժգորոդ» անցակետով։ Ուկրաինացի սահմանապահների տվյալներով՝ կեսգիշերին անցակետը ժամանակավորապես ապաշրջափակվել է։ Ներկայումս մոտ 400 բեռնատարներ սպասում են Սլովակիայից դուրս գալուն։