Շենքի ապակիները կոտրելու ենք, եթե ՊՆ նախարարը մեզ չընդունի․ անհետ կորածի ծնող

Այսօր ժամը 17:00-ին ՊՆ-ում նախատեսվում է նախարար Սուրեն Պապիկյանի և Էջմիածնի «Քիմիկների» զորամասի անհետ կորածների ծնողների հանդիպումը: Այս մասին Sputnik Արմենիային հայտնեց անհետ կորածի ծնող Կարինե Մանավազյանը։ 

Նա նշել է, որ երեկ ուշ երեկոյան են հեռացել ՊՆ-ից, քանի որ իրենց մի գնդապետ փոխանցել է՝ վաղը իրենց կընդունի նախարարը:

«Մեծ հույսեր չունենք, որ հանդիպումը կկայանա, բայց հայտարարել ենք, որ եթե նախարարը չընդունի, շենքի ապակիները կոտրելու ենք»,-ասել է նա։

Հիշեցնենք, որ օգոստոսի 30-ին ծնողներին հրավիրել էին ՊՆ նախարար Սուրեն Պապիկյանի հետ հանդիպման համար, սակայն նախարարը նրանց չէր ընդունել։ Անհետ կորածների հարազատների հետ հանդիպել էր փոխնախարար Արման Սարգսյանը։ Նրանք մոտ 2 ժամ խոսել են, սակայն պաշտոնյայի պատասխանները չի գոհացրել հանդիպման մասնակիցներին։