ԱՄՆ-ում դեռևս փորձում են պարզել Պրիգոժինի մահվան հանգամանքները

Միացյալ Նահանգները դեռ փորձում է պարզել «Վագների» հիմնադիր Եվգենի Պրիգոժինի մահվան բոլոր հանգամանքները։ Այս մասին տեղեկանում ենք ՏԱՍՍ-ից, որի փոխանցմամբ, այս մասին լրագրողներին ասել է Ամերիկայի Միացյալ Նահանգների հատուկ հանձնարարություններով դեսպան Բեթ Վան Շեքը, որը վերահսկում է ԱՄՆ պետական դեպարտամենտը։ 

«Մենք դեռ փորձում ենք հասկանալ, թե կոնկրետ ինչ է տեղի ունեցել: Ըստ երևույթին, ինքնաթիռում ինչ-որ պայթուցիկ սարք է եղել, ինչի պատճառով ինքնաթիռն ընկել է»,- ասել է Վան Շաքը: 

Նա ընդգծել է, որ ԱՄՆ-ը շարունակում է «Վագներ»-ը համարել «չափազանց վտանգավոր» կազմակերպություն, թեև «այն մնացել է առանց առաջնորդի»։ 

Հիշեցնենք՝ օգոստոսի 27-ին ՌԴ Քննչական կոմիտեն ավարտեց մոլեկուլային գենետիկական հետազոտությունները Տվերի մարզում ինքնաթիռի կործանումից հետո։ Բոլոր մահացածների ինքնությունը պարզվել է, նրանք համապատասխանում են հայտարարված ցուցակին, որում ներառված է նաև Եվգենի Պրիգոժինը։