«Անընդունելի է»․ Վրաստանում արձագանքել են Մեդվեդևի հայտարարությանը
Աբխազիան և Հարավային Օսիան Ռուսաստանին միացնելու հնարավորության մասին Ռուսաստանի Դաշնության Անվտանգության խորհրդի փոխնախագահ Դմիտրի Մեդվեդևի հայտարարությունները հակասում են Վրաստանի տարածքային ամբողջականության սկզբունքներին և անընդունելի են։ Այս մասին հայտարարել է Վրաստանի խորհրդարանի «Վրացական երազանք» իշխող խմբակցության փոխնախագահ Ռատի Իոնատամիշվիլին։
«Ցանկացած հայտարարություն, որը հակասում է Վրաստանի տարածքային ամբողջականությանը, կտրականապես անընդունելի է։ Մենք խաղաղ ճանապարհով կվերադարձնենք մեր մարդկանց ու մեր տարածքները։ Սա է մեր գլխավոր ուղերձը աբխազ և օս մեր եղբայրներին ու քույրերին»,- ճեպազրույցի ժամանակ այսպես է Մեդվեդևին արձագանքել Իոնատամիշվիլին։
ՌԴ ԱԽ փոխնախագահի հայտարարությունները ոչ լեգիտիմ է որակել նաև Վրաստանի խորհրդարանի Մարդու իրավունքների և քաղաքացիական ինտեգրման հանձնաժողովի ղեկավար Միխայիլ Սարջվելաձեն։
Հիշեցնենք՝ ավելի վաղ Դմիտրի Մեդվեդևը հայտարարել է, որ Հարավային Օսիան և Աբխազիան Ռուսաստանին միացնելու գաղափարը կարող է իրականացվել: Նշենք, որ Մոսկվան Աբխազիայի և Հարավային Օսիայի անկախությունը ճանաչել է 2008 թվականին։
