Ողբերգական վթարի գործով դեռևս որևէ անձի նկատմամբ քրեական հետապնդում հարուցված չէ. ՔԿ
Շիրակի մարզում տեղի ունեցած վթարի գործով դեռևս որևէ անձի նկատմամբ քրեական հետապնդում հարուցված չէ: Այս մասին NEWS.am-ի հարցին ի պատասխան հայտնել է ՔԿ մամուլի խոսնակ Գոռ Աբրահամյանը:
«Անհրաժեշտ բոլոր գործողություններն ամբողջ ծավալով կատարվում են հանգամանքները պարզելու համար։ Դեռևս որևէ անձի նկատմամբ քրեական հետապնդում հարուցված չէ»,-ասել է Գոռ Աբրահամյանը:
Հիշեցնենք, որ օգոստոսի 14-ի գիշերը Երևան-Գյումրի ավտոճանապարհին՝ Լանջիկ գյուղի մոտակայքում տեղի է ունեցել ողբերգական ավտովթար։ Բախվել են «Volkswagen» մակնիշի ուղևորափոխադրող միկրոավտոբուսը և «ZIL» մակնիշի բեռնատարը։ Զոհվել է 11 քաղաքացի, այդ թվում՝ միկրոավտոբուսի վարորդը, ծանր վիրավորվել՝ 6-ը։
