Ուկրաինայի արտգործնախարար Դմիտրի Կուլեբան հայտարարել է, որ ուկրաինական կողմը չի վստահում ՌԴ նախագահ Վլադիմիր Պուտինին, հետևաբար չի համաձայնի նրա մասնակցությամբ բանակցություններին։ Որպես այլընտրանք  Կուլեբան նշել է, որ երրորդ կողմը կարող է ներգրավվել ռուս-ուկրաինական հակամարտությունը դադարեցնելու բանակցություններում:

Պատասխանելով Corriere della Sera-ին տված հարցազրույցում այն ​​հարցին, թե արդյոք Վլադիմիր Պուտինը բանակցություններում Ուկրաինայի գործընկերն է, Դմիտրի Կուլեբան ասել է. «Պուտինը մեր գործընկերը չէ»։ 

«Կան այլ դիվանագիտական ​​ուղիներ՝ անուղղակի կերպով անելու համար: Բայց մեզ համար պարզ է, որ մենք երբեք չենք կարողանա Պուտինին և Զելենսկիին տեսնել նույն սեղանի շուրջ»,- ասել է ուկրաինացի նախարարը։

Կուլեբան նշել է, որ Ուկրաինան պատրաստ է խաղաղ բանակցություններ վարել Ռուսաստանի հետ, բայց ոչ Վլադիմիր Պուտինի հետ, և միայն պայմանով, որ ռուսական զորքերը դուրս բերվեն այն տարածքներից, որոնք Կիևն իրենն է համարում։

Հրապարակման լրագրողը  Կուլեբայի հետ պարզաբանել է. եթե ուկրաինական կողմը հրաժարվի բանակցել Ռուսաստանի նախագահի հետ, ապա ո՞ւմ հետ է պատրաստ քննարկել հակամարտության կարգավորման տարբերակները։ Ուկրաինայի ԱԳՆ ղեկավարը հիշեցրել է հացահատիկի գործարքի կնքման գործընթացը, երբ միջնորդների դերը ստանձնում էին ՄԱԿ-ը և Թուրքիան։

«Անցյալ տարի հացահատիկի գործարքը կնքվել է ՄԱԿ-ի գլխավոր քարտուղար Անտոնիո Գուտերեշի և Թուրքիայի նախագահ Ռեջեփ Թայիփ Էրդողանի միջնորդությամբ: Երկու առանձին պայմանավորվածություններ են եղել մեզ և Մոսկվայի հետ, ուղղակի շփում երբեք չի եղել»,- ասել է Դմիտրի Կուլեբան։

Ռուսաստանի և Ուկրաինայի միջև բանակցություններն ավարտվել են 2022 թվականի մայիսին։ Նույն թվականի հոկտեմբերին Ուկրաինայի նախագահ Վլադիմիր Զելենսկին հրամանագիր է ստորագրել, որով բացառվում է Ռուսաստանի նախագահի հետ հետագա բանակցությունների հնարավորությունը, քանի դեռ նախագահը Վլադիմիր Պուտինն է։ 2023 թվականի մայիսին պարոն Զելենսկին ասաց, որ բանակցությունները չեն սկսվի մինչև Ուկրաինայից ռուսական զորքերի դուրսբերումը։