Լեհաստանը նախատեսում է Բելառուսի հետ սահմանին 10 հազար զինվոր տեղակայել

Լեհաստանի ազգային պաշտպանության նախարար Մարիուշ Բլաշչակը հայտարարել է Բելառուսի հետ սահմանին 10 հազար զինծառայող տեղակայելու երկրի զինված ուժերի պլանների մասին։

«Սահմանին մոտ 10000 զինվոր կլինի՝ 4000-ը ուղղակիորեն կաջակցեն սահմանապահներին, 6000-ը կլինեն տարածաշրջանում»,- ասել է նա Լեհական ռադիոյին տված հարցազրույցում։

Նախարարը նշել է, որ լեհական բանակը ակտիվորեն զարգանում է։ Այն հագեցած է ժամանակակից զինատեսակներով։ Մինչ օրս Լեհաստանի զինված ուժերի հզորությունը հասնում է 170 հազար զինվորականի։

Ըստ Լեհաստանի իշխանությունների՝ լեհ-բելառուսական սահմանին ռազմական ներկայության ուժեղացման անհրաժեշտությունն առաջացել է Բելառուսի տարածքում «Վագներ» մասնավոր ռազմական կազմակերպության տեղակայումից հետո։ 

Միաժամանակ, Վարշավան նշում է, որ Բելառուսի հետ սահմանի պաշտպանության ուժեղացման հիմնական պատճառը միգրացիոն ճգնաժամն է, որը շարունակվում է 2021 թվականի աշնանից։ Լեհ սահմանապահները, իբր, գրանցում են Լեհաստան մտնել փորձող անօրինական միգրանտների թվի աճ։