ՏԵՍԱՆՅՈՒԹ․ Ակնկալում ենք Հայաստանի, Ռուսաստանի և Ադրբեջանի ղեկավարների մասնակցությամբ ևս մեկ գագաթնաժողով․ Լավրով

Ռուսաստանի արտաքին գործերի նախարար Սերգեյ Լավրովը հայտարարել է Ռուսաստանի, Հայաստանի և Ադրբեջանի ղեկավարների մասնակցությամբ գագաթնաժողով անցկացնելու պլանների մասին։ Այս մասին Լավրովն ասել է` ամփոփելով Մոսկվայում Հայաստանի և Ադրբեջանի արտգործնախարարներ Արարատ Միրզոյանի և Ջեյհուն Բայրամովի հետ եռակողմ բանակցությունների արդյունքները։
 

Ավելի վաղ հայտնել էինք, որ ՌԴ արտգործնախարար Սերգեյ Լավրովը Հայաստանի և Ադրբեջանի ԱԳ նախարարներ Արարատ Միրզոյանի և Ջեյհուն Բայրամովի հետ հուլիսի 25-ին կքննարկի Բաքվի և Երևանի միջև խաղաղության պայմանագրի նախապատրաստումը։
 

«Մենք կշարունակենք ակտիվ աշխատանքը հետագա հանդիպումների նախապատրաստման ուղղությամբ, ներառյալ Ռուսաստանի, Ադրբեջանի և Հայաստանի ղեկավարների մասնակցությամբ ևս մեկ գագաթնաժողով անցկացնելու պլանները», - եզրափակել է Լավրովը։
 

Մոսկվան ակնկալում է, որ բանակցությունները Երևանի և Բաքվի հետ կշարունակվեն, մասնավորապես` առաջարկել է եռակողմ երկխոսություն սկսել խորհրդարանականների գծով, ինչպես նաև վերսկսել երկխոսությունը քաղաքացիական հասարակության ներկայացուցիչների, փորձագետ-քաղաքագետների միջև։