Ֆրանսիայում կարող է արտակարգ դրություն հայտարարվել
Ֆրանսիայի Բնակարանային քաղաքականության հարցերով նախարարի պատվիրակ Օլիվյե Կլայնը BFM հեռուստաալիքի եթերում հայտարարել է, որ երկրում անկարգությունների հետ կապված կարող է արտակարգ դրություն հայտարարվել։
«Այսօր սեղանին են անկարգություններին արձագանքելու բոլոր տարբերակները: Պետք է դուրս գալ այս իրավիճակից, և եթե արտակարգ դրությունը արդյունավետ միջոց է, ապա այն կկիրառվի»,- ասել է Քլայնը:
Հիշեցնենք` հունիսի 27-ի առավոտյան ոստիկանները Նանտերում՝ Փարիզից արևմուտք գտնվող արվարձանում, ստուգման ժամանակ սպանել են 17-ամյա դեռահասի, որը, ըստ ոստիկանների տեղեկությունների, հրաժարվել է կատարել իրենց պահանջները: Դրանից հետո Ֆրանսիայի մի շարք քաղաքներում անկարգություններ են սկսվել, որոնք շարունակվում են արդեն մի քանի օր: Մի շարք քաղաքներում ոստիկանական հատուկջոկատայիններ են տեղակայվել, գործի են դրվել ուղղաթիռներ և զրահատեխնիկա։
