Սանկտ Պետերբուրգում «Վագների» խմբի կենտրոնից առգրավվել են 12 մլն ռուբլի, ԱԹՍ-ներ․ մանրամասներ

Սանկտ Պետերբուրգի Զոլնայա փողոցում գտնվող «Վագների» խմբի կենտրոնից առգրավվել են Ուկրաինայում հատուկ գործողության մասնակիցների պարգևներ, անօդաչու սարքեր, ինչպես նա7 ավելի քան 12 մլն ռուբլի։ Այս մասին հայտնում է РЕН ТВ-ն՝ վկայակոչելով աղբյուրին։ 

Հեռուստաալիքի տվյալներով՝ կենտրոնում խուզարկություններ են իրականացվել զինված ապստամբության դեպքի առթիվ հարուցված քրեական գործի հետաքննության շրջանակներում։ 

Ըստ РЕН ТВ-ի աղբյուրի, քննիչները հայտնաբերել են նաև ռադիոհաքերային համակարգի բաղադրամասեր, հակատանկային կառավարվող հրթիռի մասեր, գնդացիրների պահունակներ, լրացված իրականության ակնոցներ, ԱԹՍ-ներով մի քանի տուփ և մինիռոբոտ, որի գործառույթը պարզել չի հաջողվել։ 

Հունիսի 23-ի երեկոյան «Վագների» խմբի ղեկավար Եվգենի Պրիգոժինը հայտնել է, թե ՌԴ պաշտպանության նախարարության ուժերը հարձակվել են իր մասնավոր ռազմական ընկերության թիկունքի ճամբարների վրա, և նրա մարտիկները «արդարության երթով» շարժվում են Ռուսաստան։ . Պաշտպանության նախարարությունը հերքել է նրա մեղադրանքները, գլխավոր դատախազությունը գործ է հարուցել Պրիգոժինի դեմ՝ զինված ապստամբություն կազմակերպելու համար։ 

Հունիսի 24-ի առավոտյան «Վագների» խմբի ուժերը արգելափակել են Դոնի Ռոստովի վարչական շենքերը և սկսել շարժվել դեպի Մոսկվա, նախագահ Վլադիմիր Պուտինը հանդես է եկել ուղերձով՝ խմբի գործողություններն անվանելով «հարված թիկունքից»։  Նրան աջակցել են Պետդուման, Դաշնային խորհուրդը և մի շարք շրջանների ղեկավարներ, Ռոստով են ուղարկվել չեչենական «Ախմատի» ուժերը։ 

Երեկոյան Բելառուսի նախագահի մամուլի ծառայությունը հայտնել է Ալեքսանդր Լուկաշենկոյի և Պրիգոժինի բանակցությունների մասին, որոնց արդյունքում կողմերը պայմանավորվել են «իրավիճակը կարգավորելու ընդունելի տարբերակ՝ խմբի մարտիկների անվտանգության երաշխիքով»։